حاکمِ دبئی کی بیٹی کی شادی‘ دلہن نے دلکش تصاویر شیئر کردیں

دبئی ( اُردو پوائنٹ اخبارتازہ ترین ۔ 12 جون 2023ء ) دبئی اور متحدہ عرب امارات نے حال ہی میں ایک شاندار تقریب کا مشاہدہ کیا، جب شیخہ ماہرہ اور شیخ منا آل مکتوم دبئی ورلڈ ٹریڈ سینٹر کے زبیل ہال میں منعقدہ ایک شاندار تقریب میں شادی کے بندھن میں بندھ گئے۔ اماراتی میڈیا کے مطابق شیخہ ماہرہ بنت محمد بن راشد آل مکتوم اور شیخ منا آل مکتوم نے اپنی شادی کی سرکاری تقریب منعقد کی، جس میں وہ شادی کے معاہدے پر دستخط کرتے ہیں، شیخہ ماہرہ بنت محمد بن راشد آل مکتوم یو اے ای کے نائب صدر اور وزیر اعظم اور دبئی کے حکمران کی بیٹی ہیں۔
شیخہ ماہرہ بنت محمد بن راشد آل مکتوم نے انسٹا گرام پر اپنی شادی کی منفرد اور شاندار تقریب کی تصاویر شیئر کیں، اپنی زندگی کے انمول دن کے لیے شیخہ ماہرہ نے دبئی میں مقیم ڈیزائنر کا شاندار سفید گاؤن زیبِ تن کیا، اپنے شوہر شیخ منا کے روایتی اماراتی لباس کے ساتھ ہم آہنگ کرتے ہوئے دلہن نے بھی سفید رنگ کا بال گاؤن پہنا، اسے خوبصورت اور وضع دار رکھتے ہوئے شیخہ ماہرہ نے زیورات کو ہیرے کے کڑے، گھڑی اور انگوٹھیوں تک کم سے کم رکھا۔

بتایا گیا ہے کہ شہزادی شیخہ ماہرہ نے اپنے دولہا شیخ منا کے ساتھ چند شاندار تصاویر لگائیں، شاہی جوڑے نے شادی میں ایک 7 تہوں والا کیک بھی کاٹا، جس میں خوبصورت سفید میٹھے پر پھول چڑھے تھے جب کہ تقریب کی سامنے آنے والی نئی تصاویر میں خوبصورت پھولوں سے بھرا گلدستہ تھامے شاہی جوڑے کو پیار سے ایک دوسرے کو تھامے ہوئے دیکھا جاسکتا ہے۔