ملتان ٹیسٹ میں شرمناک شکست کے بعد قومی سلیکشن کمیٹی تبدیل
انگلینڈ کے خلاف ملتان ٹیسٹ میں اننگ اور 47 رنز کی شرمناک شکست کے بعد پاکستان کرکٹ بورڈ نے سلیکشن کمیٹی تبدیل کر دی ہے۔
اے آر وائی نیوز کے مطابق پاکستان اور انگلینڈ کے درمیان پہلے ٹیسٹ میچ میں قومی ٹیم کی بدترین کارکردگی اور عبرت ناک شکست کا پہلا ملبہ قومی سلیکشن کمیٹی پر گرا ہے جس کو پاکستان کرکٹ بورڈ نے تبدیل کرتے ہوئے سلیکشن کمیٹی کی تشکیل نو کر دی ہے۔
سلیکشن کمیٹی میں عالمی شہرت یافتہ امپائر علیم ڈار، سابق کپتان اظہر علی، سابق فاسٹ بولر عاقب جاوید اور حسین چیمہ ووٹنگ ممبر ہوں گے جب کہ پرانی سلیکشن کمیٹی کے رکن اسد شفیق بھی نئی سلیکشن کمیٹی کا حصہ ہوں گے۔
اس سے پہلے محمد یوسف، اسد شفیق، کپتان اور ہیڈ کوچ سلیکشن کمیٹی کا حصہ تھے۔ محمد یوسف پہلے ہی سلیکشن کمیٹی کی رکنیت سے مستعفی ہوچکے جب کہ کپتان اور ہیڈ کوچ کو سلیکشن کمیٹی کا باقاعدہ ممبر نہیں بنایا گیا ہے۔
نو تشکیل شدہ کمیٹی کا آج اجلاس ہوگا جس میں انگلینڈ کے خلاف اگلے دو ٹیسٹ میچوں کی حکمت عملی اور ٹیم سلیکشن پر غور کیا جائے گا۔