ٹیسٹ کرکٹ کی 147 سالہ تاریخ کا ’’بدترین ریکارڈ‘‘ پاکستان کے نام درج
ملتان ٹیسٹ میں انگلینڈ کے خلاف اننگ اور 47 رنز کے بھاری مارجن سے شکست پا کر پاکستان ٹیم نے ٹیسٹ کرکٹ کی تاریخ کا بدترین ریکارڈ اپنے نام درج کرا لیا۔
پاکستان کرکٹ ٹیم کی ناکامیوں اور شرمناک کارکردگی کا سلسلہ دراز ہوتا جا رہا ہے اور لگتا ہے کہ ہار اب اس کی سرشت میں شامل ہوگئی ہے تاہم ملتان میں انگلینڈ کے خلاف پہلے ٹیسٹ میچ میں قومی ٹیم کی کارکردگی نے اس بدترین کارکردگی کا مظاہرہ کیا جو ٹیسٹ کرکٹ کی 147 سالہ تاریخ میں آج تک کوئی چھوٹی سے چھوٹی ٹیم بھی نہ کر سکی۔
پاکستان ٹیسٹ کرکٹ کی 147 سالہ تاریخ کی وہ پہلی ٹیم بن گئی ہے جس نے پہلی اننگ میں 500 سے زائد رنز بنائے اور اس کے باوجود اس میچ کا اختتام اس کی اننگ اور 47 رنز کی شکست کے ساتھ ہوا ہے۔
انگلینڈ کے خلاف ملتان میں کھیلے گئے پہلے ٹیسٹ میچ میں پاکستانی کپتان شان مسعود نے ٹاس جیت کر پہلے بیٹنگ کا فیصلہ کیا اور دو دن تک بلے بازوں کا راج رہا۔
قومی ٹیم نے 556 رنز بنائے اور تین سنچریاں سامنے آئیں۔ اس میں کپتان شان مسعود (151)، سلمان علی آغا (104) اور عبداللہ شفیق (102) کی شاندار اننگز شامل تھیں۔