اتنی سردی میں میرا بچہ نہ جانے کہاں ہوگا؟ گارڈن سے لاپتہ علیان کی والدہ کی دُہائی

کراچی : گارڈن سے لاپتہ علیان کی والدہ نے دُہائی دیتے ہوئے کہا کہ اتنی سردی میں میرابچہ نہ جانے کہاں ہوگا۔

تفصیلات کے مطابق کراچی کے گارڈن ویسٹ سے لاپتہ دو بچوں کو سات روز بعد بھی تلاش نہیں کیا جا سکا۔

بچوں کے والد کا کہنا ہے کسی سے دشمنی نہیں، اعلیٰ حکام سے اپیل ہے بچے جلد تلاش کیے جائیں ہم توڈھونڈ ڈھونڈ کرتھک گئے ہیں اور تاوان کے لیے بھی کوئی کال نہیں آئی، بچے کی والدہ بار بار بے ہوش ہوجاتی ہیں۔

چار سالہ علیان کی والدہ نے اے آر وائی نیوز سے گفتگو مین دہائی دیتے ہوئے کہا سردی کا موسم ہے ناجانے بچے کس حال میں ہوں گے، اس نے نہ جیکٹ پہنا ہے نہ موزے پتہ نہیں کن ظالموں کے ہاتھ میں ہے، میرا بچہ ڈھونڈ کرلادیں۔

ڈی آئی جی ساتھ اسد رضا کا کہنا ہے کہ بچوں کی بازیابی کے لیے ہر ممکن کوشش کر رہے ہیں، 3 مشکوک افراد زیرحراست ہیں اور جیو فینسنگ بھی کی گئی ہے۔

یاد رہے گارڈن سے اغواء ہونے والے بچوں کی تلاش کے لئے پولیس نے شہریوں سے بھی مدد مانگنے کا فیصلہ کرتے ہوئے کہا تھا کہ بچوں سے متعلق اطلاع دینے والے شخص کو 3لاکھ روپے انعام دیا جائے گا۔