کامران غلام کا اسٹیو اسمتھ سے موازنہ
انگلینڈ کے سابق کپتان ناصر حسین نے پاکستان کے مڈل آرڈر بلے باز کامران غلام کو اپنے ٹیسٹ ڈیبیو پر سنچری بنانے کے بعد ان کی زبردست تعریف کی ہے اور ان کا موازنہ آسٹریلوی بلے باز اسٹیو اسمتھ سے کیا ہے۔
کامران کو دوسرے ٹیسٹ کے لیے اسٹار بلے باز بابر اعظم کی جگہ پاکستان کی پلیئنگ الیون میں شامل کیا گیا تھا اور انھوں نے اپنے ڈیبیو پر سنچری بنا کر سب کی توجہ اپنی جانب مبذول کروالی۔
وہ دس اوورز کے اندر 19-2 پر پاکستان کی جدوجہد کے ساتھ بیٹنگ میں آئے اور تیسری وکٹ کے لیے صائم ایوب کے ساتھ 149 رنز کی شراکت کے ساتھ ٹیم کی بحالی میں مدد کی۔
دائیں ہاتھ کے بلے باز نے 224 گیندوں پر گیارہ چوکوں اور ایک چھکے کی مدد سے 118 رنز کی شاندار اننگز کھیلی۔
ناصر حسین نے پہلے دن کے اختتام کے بعد اسکائی کرکٹ پر گفتگو کرتے ہوئے کامران کو خوب سراہا۔ انگلینڈ کے سابق کپتان نے کامران کی اننگز کی پختگی کی تعریف کی۔
ان کا کہنا تھا کہ کامران کو اپنی باری کا انتظار کرنا پڑا وہ پچھلے تین سالوں میں شاندار رنز بنا رہا ہے۔ اس نے جارحیت اور دفاع کے درمیان صحیح توازن حاصل کیا۔