سندھ حکومت اور فپواسا کے درمیان ڈیڈ لاک برقرار، 4 دن سے جامعات میں تدریس معطل
کراچی: سندھ حکومت اور فپواسا کے درمیان ڈیڈ لاک برقرار ہے، جس کی وجہ سے گزشتہ 4 دن سے جامعات میں تدریس معطل ہے۔
سندھ کی جامعات میں ترمیمی ایکٹ کے خلاف احتجاج کی وجہ سے گزشتہ چار دنوں سے لاکھوں طلبہ حصول علم سے محروم ہیں، آج سندھ کی سرکاری جامعات میں تدریسی عمل کے بائیکاٹ کا چوتھا دن ہے۔
17 سے زائد سرکاری جامعات کے ترمیمی ایکٹ کے خلاف احتجاج کا سلسلہ جاری ہے، یہ احتجاج سندھ کی جامعات کے اساتذہ کی نمائندہ تنظیم فپواسا سندھ چیپٹر کے تحت کیا جا رہا ہے۔
جنرل سیکریٹری فپواسا سندھ پروفیسر ناگ راج نے بتایا کہ تدریسی امور کا بائیکاٹ غیر معینہ مدت تک کے لیے کیا گیا ہے، 18 ویں آئینی ترمیم مرکزیت کو ختم کرتی ہے، سندھ حکومت اس ترمیم کی آڑ میں مرکزیت کی جانب گامزن ہے۔
پروفیسر ناگ راج کے مطابق سندھ کی جامعات میں کمیشن پاس یا بیورو کریٹ کے وائس چانسلر کی تعیناتی قبول نہیں کریں گے۔
انھوں نے کہا کہ فپواسا سندھ چیپٹر کا جنرل باڈی اجلاس آج جامعہ کراچی میں منعقد ہوگا، جس کے بعد وزیر اعلیٰ ہاؤس یا سندھ اسمبلی پر احتجاج کا حتمی فیصلہ کیا جائے گا۔