سینیٹر زاہد خان نے عوامی نیشنل پارٹی کو خیبرباد کہہ دیا، ذرائع
عوامی نیشنل پارٹی (اے این پی) کے سینئر رہنما اور سینیٹر زاہد خان نے پارٹی کو خیبرباد کہہ دیا، وہ جلد ہی ن لیگ میں شمولیت کا اعلان کریں گے۔
تفصیلات کے مطابق اس حوالے سے ذرائع کا کہنا ہے کہ اے این پی کے سینیٹر زاہد خان کل مسلم لیگ ن میں شمولیت کا باقاعدہ اعلان کریں گے۔
ذرائع کا مزید کہنا ہے کہ سینیٹر زاہد خان ن لیگ کے وفاقی وزیر امیر مقام کے ساتھ پریس کانفرنس سے خطاب میں اہم اعلان کریں گے۔
واضح رہے کہ اے این پی کے سینیٹر زاہد خان سے متعلق گزشتہ ماہ سے کئی خبریں زیر گردش ہیں کہ انہوں نے عملی سیاست سے کنارہ کشی اختیار کرنے کا اعلان کردیا۔
اس کے علاوہ یہ بھی کہا جارہا تھا کہ گزشتہ ماہ زاہد خان نے پارٹی قیادت سے مبینہ اختلافات کے سبب پارٹی کے ترجمان کا عہدہ چھوڑنے کا اعلان کیا تھا۔
اس کے علاوہ مختلف ذرائع سے چلنے والی خبروں کے مطابق انہوں نے عوامی نیشنل پارٹی کے ترجمان کا عہدہ چھوڑنے کے ساتھ ساتھ انٹرا پارٹی الیکشن میں بھی حصہ نہ لینے کا فیصلہ کیا تھا۔