آرمی چیف کا دفاعی نمائش آئیڈیاز 2024 کا دورہ، اسلحہ و سازو سامان کا مشاہدہ
آرمی چیف جنرل عاصم منیر نے دفاعی نمائش آئیڈیاز 2024 کا دورہ کیا اور اسلحے سمیت سازو سامان کا مشاہدہ کیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے دفاعی نمائش آئیڈیاز کا دورہ کیا اس موقع پر کور کمانڈر کراچی لیفٹیننٹ جنرل بابر افتخار نے استقبال کیا۔
ترجمان پاک فوج کا کہنا ہے کہ آرمی چیف نے دوست ممالک کی دفاعی نمائش میں شرکت کو سراہا، پاک فوج کے سپہ سالار نے مقامی اور بین الاقوامی نمائش کنندگان کی حوصلہ افزائی کی۔
دفاعی نمائش میں 557 نمائش کنندگان شریک ہیں، دفاعی نمائش میں 333 بین الاقوامی اور 224 مقامی شرکا شریک ہیں جبکہ 36 ممالک کے اسٹالز لگائے گئے ہیں جبکہ 17 ممالک پہلی بار نمائش میں شریک ہیں۔
آئی ایس پی آر کا کہنا ہے کہ آرمی چیف نے فوجی حکام اور دفاعی مندوبین سے بات چیت بھی کی، دفاعی نمائش میں شاہپر تھری بغیر پائلٹ طیارہ توجہ کا مرکز رہا، پاکستانی ساختہ شاہپر تھری ڈرون کا دفاعی نمائش میں افتتاح کیا گیا۔