برطانیہ میں طوفان ”برٹ“ کا الرٹ جاری، سیلاب کا خطرہ
لندن: برطانیہ میں طوفان ”برٹ“ کا الرٹ جاری کر دیا گیا، طوفان کے باعث شدید برفباری، تیز ہواؤں اور سیلاب کا خطرہ ہے۔
غیر ملکی ذرائع ابلاغ کے مطابق طوفان ”برٹ“ کے باعث برٹش گیس نے شہریوں کو خوراک اور پانی ذخیرہ کرنے کی ہدایت کردی ہے۔ اس کے علاوہ بجلی بندش کے خدشے پر ٹارچ، موم بتیاں اور ایمرجنسی لائٹس گھروں میں رکھنے کی ہدایات کی گئی ہیں۔
میڈیا رپورٹس کے مطابق اسکاٹ لینڈ کے پہاڑی علاقوں میں درجہ حرارت منفی 6 سینٹی گریڈ تک گرنے کا امکان ہے، سفرکرنے والے شہریوں کوگاڑی میں کھانا، پانی اورکمبل ساتھ رکھنے کی ہدایت بھی کی گئی ہے۔
محکمہ موسمیات کے مطابق ہفتے کے روز اسکاٹ لینڈ میں 40 سینٹی میٹر تک برفباری کی پیشگوئی کی گئی ہے، ڈارٹمور اور ساؤتھ ویلزمیں شدید بارشوں کا امکان ہے۔
شمالی آئرلینڈ، مغربی اسکاٹ لینڈ میں ہوا کی رفتار 70 میل فی گھنٹہ تک جا سکتی ہے، پولیس نے اسکاٹ لینڈ میں شہریوں کوغیرضروری سفر سے گریزکی ہدایات جاری کی ہیں۔
واضح رہے کہ برطانیہ میں برف باری اور سردی کی شدید لہر نے ہر شے کو منجمد کر دیا ہے، دھند، برف باری اور یخ بستہ ہواؤں نے پارہ نقطہ انجماد سے گرا دیا۔