صارم کو کس نے اور کیوں قتل کیا؟ خصوصی انویسٹی گیشن ٹیم اپارٹمنٹ پہنچ گئی
کراچی : صارم قتل کیس کی تحقیقات کے لیے ڈی ایس پی فرید احمد خان کی سربراہی میں خصوصی انویسٹی گیشن ٹیم اپارٹمنٹ پہنچ گئی۔
تفصیلات کے مطابق سات سالہ صارم قتل کیس میں 4 رکنی خصوصی انویسٹی گیشن ٹیم نے کام شروع کردیا ، ڈی ایس پی فرید احمد خان کی سربراہی میں خصوصی انویسٹی گیشن ٹیم اپارٹمنٹ پہنچ گئی ہے۔
خصوصی انویسٹی گیشن ٹیم نے صارم کے اہلخانہ اور اپارٹمنٹ کےمکینوں سے ملاقات کی اور جائے وقوع کا بھی دورہ کیا ساتھ میں شواہد کا ایک مرتبہ پھرجائزہ لیا۔
خصوصی انویسٹی گیشن ٹیم رات گئے بھی اپارٹمنٹ پہنچی تھی اور شواہد اکٹھے کیے تھے جبکہ زیرحراست مشکوک افراد سے ایک بار پھر پوچھ گچھ کی گئی۔
اس سے قبل کیس میں زیر حراست 5 مشتبہ افراد کے ڈی این اے نمونے کراچی یونیورسٹی کی لیب کو بھجوا دیے گئے ہیں۔
پولیس حکام نے بتایا کہ گزشتہ روز تحقیقاتی ٹیم نے ابتدائی پوسٹ مارٹم سے متعلق ڈاکٹرز سے ملاقات کی ، جس میں ابتدائی پوسٹ مارٹم اور شواہد کے حوالے سے ڈاکٹرز کی رائے لی۔