رواں برس امارات کی معیشت میں نمایاں اضافے کی پیشگوئی

ابوظہبی ( اُردو پوائنٹ اخبارتازہ ترین ۔ 03 جون 2023ء ) رواں برس متحدہ عرب امارات کی معیشت میں نمایاں بہتری کی پیشگوئی کردی گئی۔ خلیجی اخبار الامارات الیوم کے مطابق عرب مالیاتی فنڈ کو توقع ہے کہ موجودہ اور اگلے برسوں کے دوران متحدہ عرب امارات میں اقتصادی ترقی کی رفتار جاری رہے گی، کاروباری اعتماد میں اضافے اور تیل کی قیمتوں میں اضافے کے نتیجے میں 2022ء سے 2024ء کے دوران 4.6 فیصد کی اوسط اقتصادی شرح نمو حاصل کرے گی۔
"عرب معیشت کے امکانات” کے عنوان سے ایک حالیہ رپورٹ میں فنڈ نے کہا کہ متحدہ عرب امارات کی معیشت میں اس سال 4.2 فیصد اضافے کی توقع ہے، جب کہ اسی سال صارفین کی قیمتوں کا انڈیکس 2.9 فیصد اور اگلے سال 2.57 فیصد تک گرنے کی توقع ہے، رپورٹ میں تیل اور گیس کی قیمتوں میں استحکام اور زرعی مصنوعات سمیت اجناس کی قیمتوں میں کمی اور مہنگائی کو روکنے کے لیے مالیاتی پالیسیوں کی اسی طرح سختی کے ساتھ عرب معیشتوں میں 2023 میں تقریباً 3.4 فیصد اضافے کی توقع ظاہر کی گئی ہے۔
ADVERTISING
رپورٹ میں یہ بھی توقع ظاہر کی گئی ہے کہ 2024ء میں عرب ممالک میں اقتصادی ترقی کی رفتار تقریباً 4 فیصد تک بہتر ہو جائے گی اس کی وجہ تیل اور اجناس کی قیمتوں میں استحکام کی توقعات اور افراط زر پر سخت کنٹرول ہے، تیل برآمد کرنے والے اہم عرب ممالک توانائی کی قیمتوں کی سطح میں بہتری سے فائدہ اٹھائیں گے، کیوں کہ اس سے 2023ء اور 2024ء کے دوران ان ممالک کی اقتصادی ترقی پر مثبت اثرات مرتب ہوں گے اور یہ کہ تیل کے بڑے گروپ برآمد کرنے والے ممالک 2023ء میں 3.4 فیصد کی شرح نمو کا مشاہدہ کریں گے جو 2024ء کے دوران 4.2 فیصد تک بڑھ جائے گی۔