امارات کے باہر سے نئے کارکنوں کی بھرتی کیلئے 7 شرائط عائد

ابوظہبی ( اُردو پوائنٹ اخبارتازہ ترین ۔ 07 جون 2023ء ) متحدہ عرب امارات کے باہر سے نئے کارکنوں کی بھرتی کیلئے 7 شرائط عائد کردی گئیں۔ خلیجی اخبار الامارات الیوم کے مطابق انسانی وسائل اور امارات کی وزارت نے وزارت کے ساتھ رجسٹرڈ نجی شعبے کے اداروں اور آجروں کے لیے سات شرائط رکھی ہیں تاکہ وہ ملک سے باہر سے نئے کارکنوں کو بھرتی اور ملازمت دے سکیں، کمپنی کی ضروریات کو پورا کرنے کے لیے ملک سے باہر سے نئے کارکنوں کو بلانے کے لیے 7 شرائط کو پورا کرنے کی صورت میں ہی اداروں کو نئے ورک پرمٹ حاصل کرنے کی اجازت ملتی ہے۔
بتایا گیا ہے کہ وزارت 12 قسم کے ورک پرمٹ جاری کرتی ہے جو وزارت کے ساتھ رجسٹرڈ اداروں کو کام کی قسم اور نوعیت کے مطابق ورک پرمٹ حاصل کرنے کی اجازت دیتی ہے، کیوں کہ وزارت سے اجازت نامہ حاصل کرنے کے علاوہ ملک میں کام کرنے کی اجازت نہیں ہے، ورک پرمٹ حاصل کرنے کے علاوہ کسی کارکن کو بھرتی کرنا یا ملازمت دینا جائز نہیں ہے، 7 شرائط درج ذیل ہیں؛
(1) کمپنی میں الیکٹرانک پرمٹ کا اجراء ضروری ہے
(2) بھرتی کیے جانے والے کارکن کی عمر 18 سال سے کم نہیں ہونی چاہیے
(3) خصوصی پیشوں میں متعلقہ شرائط کی تکمیل کی گئی ہو
(4) بھرتی کیے جانے والے کارکن کا پیشہ ادارے کی سرگرمی سے مطابقت رکھتا ہو
(5) بھرتی کی درخواست جمع کرانے والے ادارے کے پاس ایک درست لائسنس ہو
(6) کمپنی کے قانونی طور پر مجاز نمائندے کے ذریعے ورک پرمٹ حاصل کیا جائے
(7) بھرتی کیے جانے والے کارکن کے لیے پہلے سے موثر ورک پرمٹ موجود نہ ہو