ملتان ٹیسٹ میں بدترین شکست کے باوجود ہیڈ کوچ مطمئن

انگلینڈ نے پاکستان کو پہلے ٹیسٹ میچ میں اننگ اور 47 رنز کے بڑے مارجن سے ہرا دیا لیکن قومی ٹیم کے ہیڈ کوچ مطمئن ہیں۔

پاکستان کرکٹ ٹیم شکست پر شکست کھا رہی ہے لیکن ریڈ بال کے ہیڈ کوچ اب بھی مطمئن اور پر امید ہیں۔ قومی ٹیم کو گزشتہ ماہ بنگلہ دیش نے دو ٹیسٹ میچوں کی سیریز میں وائٹ واش کیا اور اب انگلینڈ نے ریکارڈ ساز ٹیسٹ میچ کھیل کر قومی ٹیم کو ملتان میں شرمناک شکست دے دی۔

میچ کے بعد گفتگو کرتے ہوئے پاکستان ریڈ بال ٹیم کے ہیڈ کوچ جیسن گلیسپی نے اطمینان کا اظہار کرتے ہوئے کہا ہے کہ قومی ٹیم نے پہلی اننگ میں اچھی بیٹنگ کی اور اس کارکردگی سے مطمئن ہوں۔

جیسن گلیسپی نے کہا کہ بدقسمتی سے بولنگ ہمارے پلان پر پورا نہیں اترے اور ملتان کی وکٹ سے یہ توقعات تھیں۔

ان کا کہنا تھا کہ مجھے اب بھی یقین ہے کہ اگر کھلاڑیوں کو بیک کریں گے، تو یہی کھلاڑی اچھا پُرفارم کر سکتے ہیں۔

واضح رہے کہ ملتان ٹیسٹ میں اتنی بڑی شکست کے بعد پاکستان ٹیم نے ٹیسٹ کرکٹ کی 147 سالہ تاریخ کا بدترین ریکارڈ اپنے نام درج کرا لیا ہے۔