اسرائیل کا بیروت پر تیسرا بڑا حملہ : 22 شہری شہید
اسرائیلی فوج نے لبنان میں اپنی کارروائیاں جاری رکھی ہوئی ہیں، دارالحکومت کے اہم علاقے الضاحیہ میں حزب اللہ کے گڑھ پر میزائلوں سے حملہ کیا گیا جس کے نتیجے میں 22 افراد کی شہادت کی اطلاع موصول ہوئی ہے۔
غیر ملکی خبر رساں ادارے الجزیرہ کی رپورٹ کے مطابق اسرائیل نے بیروت کے جنوبی نواحی علاقے الضاحیہ میں حزب اللہ کے گڑھ کے علاوہ دارالحکومت کے قلب میں دو علاقوں النویری اور البسطا میں رہائشی محلوں کو نشانہ بنایا ہے۔
مذکورہ حملے میں کم از کم 22 افراد شہید اور 117 زخمی ہوئے ہیں، گزشتہ شب ہونے والے اسرائیلی حملوں کے بعد بیروت کی فضا میں دھوئیں کے گہرے بادل اٹھتے دکھائی دیے۔
واضح رہے کہ گزشتہ دو ہفتوں کے دوران میں اسرائیل نے تقریباً روزانہ کی بنیاد پر بیروت کے جنوبی نواحی علاقے الضاحیہ کو جو حزب اللہ کا گڑھ سمجھا جاتا ہے، حملوں کا نشانہ بنایا گیا۔
23ستمبر کے بعد سے اب تک اسرائیلی حملوں میں 1200 سے زیادہ لبنانی شہید ہو چکے ہیں جب کہ 12 لاکھ سے زیادہ افراد نقل مکانی کرگئے۔ یہ تعداد سرکاری اعداد و شمار کے مطابق ہے۔