پاک سعودی دفاعی صنعتی فورم اجلاس، سعودی وفد کا پاک افواج کی گراں قدر خدمات کا اعتراف
پاک سعودی عرب دوطرفہ دفاعی صنعتی فورم کا ساتواں اجلاس ہوا، اجلاس 10 اکتوبر کو سعودی دارالحکومت ریاض میں منعقد ہوا۔
اے آر وائی نیوز کے مطابق آئی ایس پی آر نے بتایا کہ سعودی معززین نے دہشت گردی کے خلاف پاکستان کی کامیابیوں اور قربانیوں کو سراہا، سعودی وفد کی جانب سے علاقائی امن و استحکام کیلئے پاک افواج کی گراں قدر خدمات کا اعتراف کیا گیا۔
پاکستان ٹرائی سروسز وفد کی قیادت چیف آف جنرل اسٹاف لیفٹیننٹ جنرل اویس دستگیر نے کی، سعودی وفد کی قیادت معاون وزیر دفاع طلال بن عبداللہ العتیبی نے کی۔
آئی ایس پی آر نے بتایا کہ اجلاس میں عالمی و علاقائی سلامتی کودرپیش چیلنجز، دفاعی افواج پر ان کے اثرات پر بھی تبادلہ خیال کیا گیا، جاری شعبوں میں تعاون پر پیش رفت کا جائزہ لیا گیا اور نئے شعبوں پر اتفاق کیا گیا۔
لیفٹیننٹ جنرل اویس دستگیر نے سعودی فورسز کی استعدادکار میں اضافے کیلئے مسلسل تعاون کی یقین دہانی کرائی۔
اس کے علاوہ پاک سعودی دفاعی صنعتی فورم نے جدید ٹیکنالوجی میں تیز ترقی، دفاعی صنعتی تعاون مزید بڑھانے کی ضرورت پر زور دیا۔