ہنی ٹریپ کرکے لوگوں کو کچے کے ڈاکوؤں کے حوالے کرنے والی عورت گرفتار
کراچی : پولیس نے شہریوں کو شادی کا جھانسہ دے کر انہیں کچے کے ڈاکوؤں کے حوالے کرنے والی ملزمہ کو گرفتار کرلیا۔
تفصیلات کے مطابق اینٹی وائلنٹ کرائم سیل (اے وی سی سی) حکام کے مطابق کچے کے ڈاکوؤں کی مبینہ سہولت کار خاتون ملزمہ کو کراچی کے علاقے سہراب گوٹھ سےگرفتار کیا گیا۔
سہراب گوٹھ میں اینٹی وائلنٹ کرائم سیل نے شہریوں کو شادی کا جھانسہ دے کر کشمور، کندھ کوٹ، شکار پور اور گھوٹکی بھیجنے والی خاتون ملزمہ کو گرفتار کرلیا ملزمہ سے ہنی ٹریپ میں استعمال ہونے والی سم بھی برآمد کی گئی۔
خاتون ملزمہ خود کو کچے کے ڈاکوؤں کے سربراہ بڈیل خان کی بیوی بتاتی ہے، اے وی سی سی حکام کے مطابق ملزمہ کی مدد سے ڈاکو شہریوں کو کچے میں لے جا کر تاوان لیتے تھے۔
علاوہ ازیں کراچی کے مختلف علاقوں میں فائرنگ سے چھ افراد زخمی ہوگئے جنہیں مقامی اسپتالوں میں طبی امداد فراہم کی گئی۔