پی ٹی آئی کے جاں بحق کارکنوں کے خاندانوں کیلیے علی امین گنڈاپور کی جانب سے ایک کروڑ روپے کا اعلان
وزیراعلی خیبر پختونخوا نے پی ٹی آئی احتجاج کے دوران جاں بحق ہونے والے پارٹی کارکنوں کے لیے ایک ایک کروڑ روپے کا اعلان کیا ہے۔
اے آر وائی نیوز کے مطابق وزیراعلیٰ کے پی علی امین گنڈاپور نے مانسہرہ میں پریس کانفرنس کرتے ہوئے کہا ہے کہ ہم پر براہ راست گولیاں برسائی گئیں۔ بشریٰ بی بی میرے ساتھ تھیں، ان پر بھی حملہ کیا گیا۔ جو لوگ کل متاثر ہوئے، ان ہزاروں کارکنان کا ڈیٹا بھی آ رہا ہے۔
وزیراعلیٰ کے پی نے کہا کہ اس واقعے میں جتنے کارکن شہید ہوئے ہیں۔ ان کے خاندان کو ایک، ایک کروڑ روپے کی مالی امداد دی جائے گی۔
علی امین گنڈاپور شہید کارکنوں کے ورثا سے تعزیت اور افسوس کا اظہار کرتے ہوئے کہا کہ اس جدوجہد میں کارکنوں کے جذبے کو سلام پیش کرتا ہوں۔
انہوں نے اس واقعے میں زخمی کارکنوں کی جلد صحتیابی کے لیے بھی دعا کی اور کہا کہ ہم اپنے ورکرز کے ساتھ کھڑے ہیں اور انہیں تنہا نہیں چھوڑیں گے۔