سعودی عرب میں 146 غیر ملکی گرفتار، وجہ کیا بنی؟

سعودی عرب کی ریاض ریجن پولیس کا کہنا ہے کہ وادی حنیفہ میں 146 مشکوک افراد پائے گئے، تحقیقات کرنے پر معلوم ہوا کہ وہ ملک میں غیر قانونی طور پر سرحد عبور کرکے پہنچے تھے۔

سعودی خبر رساں ادارے کی رپورٹ کے مطابق پولیس نے بتایا کہ ’سپیشل فورس کے تحت کی جانے والی کارروائی میں گرفتار ہونے والے یمنی اور ایتھوپین درانداز تھے‘۔

ریاض پولیس نے اپنے جاری کردہ بیان میں کہا ہے کہ ’گرفتار شدگان سے تفتیش جاری ہے تاکہ معلوم کیا جاسکے کہ کون ان کا سہولت کار بنا ہے۔

ریاض پولیس وارننگ جاری کرتے ہوئے کہا کہ غیر قانونی افراد کے ساتھ تعاون کرنا، انہیں سہولت فراہم کرنا، انہیں کسی بھی قسم مدد فراہم کرنا سنگین جرم کے زمرے میں آتا ہے۔ ’جس پر 15 سال قید اور 10 لاکھ ریال جرمانے کے علاوہ تشہیر بھی کی جائے گی‘۔

اس سے قبل سعودی عرب میں 22 ملین ریال کی دھوکہ دہی میں ملوث دو تارکین وطن کو مکمل ثبوت اور گواہان کے بیانات کے بعد سخت ترین سزائیں سنادی گئیں۔

سعودی گزٹ کی رپورٹ کے مطابق مملکت میں دھوکہ دہی کی 177 وارداتوں میں ملوث دو غیر ملکیوں کو لمبی قید اور بھاری جرمانوں کی سزا سنا دی گئی ہے۔