میرے لیے بھی بجلی کے بل ادا کرنا مشکل ہو گیا، شرمیلا فاروقی پھٹ پڑیں
پاکستان پیپلز پارٹی کی رہنما شرمیلا فاروقی نے کہا ہے کہ میرے لیے بھی بجلی کے بل کی ادائیگی مشکل ہو گئی ہے، بلوں نے عوام کے ہوش اڑا دیے۔
قومی اسمبلی اجلاس میں بجلی کے زائد بلوں کے حوالے سے قرارداد ایوان میں پیش کی گئی، بجلی کے زائد بلوں کی قرارداد پیپلز پارٹی کی رکن شرمیلافاروقی نے پیش کی، اس موقع پر شرمیلا فاروقی نے کہا کہ بجلی کے زائد بلوں نے عوام کے ہوش اڑا کر رکھ دیے ہیں۔
پی پی رکن شرمیلا فاروقی کا نکتہ اعتراض پر اظہار خیال کرتے ہوئے کہنا تھا کہ لوگوں کیلئے بجلی کے بلوں کی ادائیگی ممکن نہیں رہی۔
شرمیلا فاروقی نے کہا کہ میرے لیے بھی بجلی کا بل ادا کرنا مشکل ہوچکا، حکومت بجلی کے بلوں کی مد میں ریلیف دینے کیلئے ہنگامی اقدامات کرے۔
دریں اثنا وفاقی حکومت نے ماہانہ 200 یونٹ تک بجلی استعمال کرنے والوں سے سبسڈی واپس لے لی ہے، اکتوبر سے اس زمرے میں آنے والے صارفین 9 سے 29 روپے فی یونٹ ادا کریں گے، مذکورہ صارفین کو بلوں میں مزید ریلیف فراہم نہیں کیا جائے گا۔
50 یونٹ تک بجلی استعمال کرنے والے پروٹیکٹڈ صارفین سے 9.39 روپے جبکہ 51 سے 100 یونٹ استعمال کرنے والوں سے 13.64 روپے فی یونٹ چارج لیا جائے گا۔ ماہانہ 101 سے 200 یونٹ استعمال کرنے والوں کیلیے بجلی کا فی یونٹ 29 روپے 21 پیسے ہوگا۔